خاطر 6

مادري الشعور اللي احس فيه واللي اسمّيه ((شعور اليمره)) في احد غيري يعرفه و يحس به والا بس انا؟؟؟ لما ما اقدر انام و لا اقدر اكون صاحيه،، و لااقدر اتنفس ،،وما اقدر الهّي نفسي و لا اندمج بسوالف اللي مداري و طول الوقت ما افكر بشي غير هالشعوووور نفسه..اليمره ..اليمره..اليمره..مادري والله بس ساعات احس به بدون سبب و ساعات لما اسمع اغنيه معينه(مثل اللي صار الحين عقب ما سمعت تغيب لعبدالمجيد).. مادري معانيها اللي تحسسني باليمره.. او زمنها اللي افكر فيه..و ازعل عليه..ازعل وااايد،،لأن الوقت ذاك كان حلو، و كنا صغار و حلوين،،حتى اني اقدر اشم ريحته و اميّز نور الشمس فيه وقت العصر بالذاااااات،،لا و بعد اقدر اتذكر منظر نجومه ايام ما كنت اطالع فووووق..السما ،،و اقول هاذي نجمه لا لا لالالا هاذي كوكب و هاذي طياره بعيييييده و هاذي برج الميزان و ذيك (دونه) والقمر تحتها ،،و القوس وينه؟؟!بس بس ما يحتاي مب مهم هالبرج خل ادور عالدلو..برجي حبيبي..(ترى مب تافهه بس كنت ياهل!) لكن والله موضوعي اللي ابيله حل..ارجع و اقول..هو.. (شعور اليمره) اللي من تنطفي ترجع مره ثانيه بنفس الأعراض و نفس الطريقه اللي ماحبها،، مع ان ذاك الزمن راح و وقته ولّى ،، و بصراحه اللي يعيش بهالوقت بالذات يقووول خلالالالاص ما ابي شي ثاني و ليش ارجع ورا

مادري،، ماعرف،، مافهم والله... اروح اصلي العصر احسن لي

http://songs.6arab.com/3abdelmajeed..tgheeb.ram

خاطر 5

صباح جديد ككل صباحاتي في بلادى !!! لا يحتوي صباحي هذاعلى شيء غير تفاصيل الامس القريب او روتين اليوم الممل

فى كل ليلة احلم بشئ جديد يذوّب جمود اليوم الآخرولكن قبل ان يكتمل الحلم أفيق على صوت امى الذي ينبض بالحياة تنادى هيا فقد ادركنا يوم جديد

اسير فى نفس الشوارع والمح نفس الوجوه ، لم أشعر يوماً ما بأي شيء يشدني لهذه الطرقات الساكنة، و هذه الاماكن النائمة..فلماذا تقيدني حبالها ولماذا تخنقني الحياة فيها !!!!و لماذا أشعر اننى لا استطيع مفارقتها ولماذا كلما هممت ان اهجرها الى مكان آخر اشعر انى احاول الانتحار!!؟؟؟

خاطر 4

صديقه لي ما تؤمن بالصدف بتاتاً و شايله موضوع النقاش بهالسالفه من مخها تماماً و دايماً تقول ان اللي نشوفه بالأفلام غيييييير،،،

ساعات نسمع ان فلانه صار لها هالموقف اللي ما يصير الا في الخيال،،صدفه،،و فلان لقى اللي كان مستحيل يلقاه الا باحلامه،،و بكل بساطه ،تخيلوا،،،بدون ما يدري!!صدفه!،،لا و جارتنا مسكينه سبحان الله بعد زواج صار له 18 سنه رجعت تزوجت حبها الأول اللي نطرها طول هالسنين!!!و ادري ان محد ينطر احد بهالزمن يا جماعه لكنها تعيد و تزيد و تقول ان الموضوع صار صدفه!!

و يوم ثاني نسمع مأساة فلانه اللي توفولها عيالها كلهم في نفس اليوم و كل واحد بحادث شكل!!! و طبعاً علامات التعجب توصل الف و الكل يقول شنووووو ذيييييييييييييييي؟؟صدفه يعني راحوا في نفس اليوم؟؟ و تحصل واييييد ان الشي اللي كان ضايع من عندك و مرمرك و هد حيلك و انت تدوره في النهايه تلقاه جدام عينك موجود..و طبعاً بتكون شايفه بالصدفه

اللي ابي افهمه و اعرفه ليش هي مصره مع ان الدلائل كلها تثبت ان مساحة الصدفه هذي فعلاً موجودة في حياة كل واحد فينا و تكون أمر مسلّم به (و انا هني بعيدة كل البعد عن موضوع القضاء و القدر) لأنها تكلمت عنه و انا فصلت فيما بينهم

هي تقول ان كل الموضوع عبارة عن مجموعة اسباب (امور دنيويه بحته)تتجمع مع بعضها من غير ما ندري و لما تصير في موقف معين نقوم احنا نسميها صدفه! و نبتدي نظن انها وليدة اللحظة و المكان و الوقت مع انها من (صنع ايدينا و النبي) و ساعات تكون قضاء من رب العالمين اذا كان تفسيرها عقيم

!!!!!

انا بصراحه اظن ان اللي يلعب دور كبييييير بحياتنا هوالجانب الغيبي ..و من مدرسته تخرجت الصدفه

ما في فايده..لا هي اقتنعت و لا قدرت اقنعها..في النهايه هي فاقده شعور وايد حلو..بس لكم دينكم و لي دين و اختلاف الراي لا يفسد للود قضيه و عسى ما جيت في وقت لغيري..وعسى ما جيت لك صدفه.!!.و الشاطر يفهم